À dì la franca, Dieudonné ci colla in gola. Sti pochi tempi ùn si sente più parlà chè di u famosu umoristu è di u so gestu dettu « dispettosu, razzistu è antesimitu » o per d’altri « antisistema ». Hè vera chì u so sustenidore è imitadore, u ghjucadore di ballò Nicolas Anelka, hè propiu contru à u sistema. Cù Narta facia a publicità contru à u sudore, cù Pringles era contru à e chips, cù Danette contru à i yaourts, cù Quick contru à u malmanghjà, è po cù nike, Adidas, Puma è Airness era ancu contru à u sport. In fine… gestu antisemitu o antisistema, per avà a pulemica ci hè sempre è po ghjè suchjosa. In Francia certi ghjurnali si mantenenu per via di prime pagine razziste, è certi umoristi campanu per via di prupositi antisemiti. Oghje chì ghjè oghje l’omu neru è u ghjudeiu sò dui business ind’è u paese di i diritti di l’omi è di l’ugualità. Sti pochi ghjorni u cunfrontu trà Manuel Valls è Dieudonné M’bala M’bala hè diventatu una spezia di “Fà mi piantà s’è tù poi”. In fatti u ministru di l’Internu hà mandatu un circulare à i prifetti per dà li a pussibilità di pruibisce i spettaculi di l’umoristu. Dapoi, u spettaculu di Dieudonné, cundannatu parechje volte per antisemitisimu, ùn hè ancu à compie. Ognunu penserà ciò ch’ellu vole di l’umoristu, però ci hè da dumandà si s’è pruibisce i so spettaculi hè propiu a soluzione bona. Forse chì ùn ci vulerebbe micca chì, per via di a lotta contru à l’antisemitisimu di Dieudonné, omu pudessi strappà e libertà fundamentale. In fatti, per u so circulare, Manuel Valls s’hè ghjuvatu di una decisione di u Cunsigliu di Statu di u 1995 nantu à u « slanciu di nanni ». Tandu u paragone hè appena sciancu chì quandu omu và à un slanciu di nanni, hè sicuru di vede un nannu lampatu. Eppuru, quand’omu và à vede un spettaculu di Dieudonné, omu ùn hè sicuru di vede una dichjarazione antisemita. U fattu di pruibisce i so spettaculi serebbe a più bella manera di fà lu passà per un martiru. Caccià a libertà à i nemichi di a libertà puderia ancu esse periculosu. D’altronde, l’interessu di i media per st’affare ci ramenta u cunflittu trà Nicolas Sarkozy è Tariq Ramadan qualchì annu fà. Sta volta quì hè Manuels Valls chì l’hà cù Dieudonné. Hè ancu stranu di vede chì e reazzione contru à stu persunagiu custì accadenu solu avà. Pare chì l’umoristu sia diventatu antisemitu quindeci ghjorni fà. .. Ci serà ancu un interessu propiu puliticu à fà durà a pulemica chì sti pochi tempi a situazione in Francia ùn hè a più maravigliosa. U fattu si stà chì simu in Francia è chì in stu casu quì si parla di i ghjudei è di l’antisemitisimu. Volta forse dinù a paura di vede affaccà u murtulaghju di Vichy. Stu passatu chì ùn passa. Tandu omu pruibisce ind’è u paese induve, tempi fà, era interdettu d’interdisce. Al di là di a scusa di Dieudonné, certi diceranu chì hè a libertà di spressione chì hè minacciata. In fatti, ciò chì pone prublema dinù hè Internet. Un spaziu tamantu di libertà induve omu pò palisà u so parè, puru contru à ogni dogma di a sucetà. Certi diceranu chì a libertà hà di più valore chè sensu, ma tandu induve si ferma a libertà ? Imaginemu una stonda un umoristu prontu à ghjucà si i Corsi à a risa cù e nostre vittime di a guerra è di u nazisimu, cù e nostre vittime di Furiani, cù l’impiccati di u Niolu spiechendu u so rigrettu chì u conte di Narbonne ùn appia compiu u so travagliu. Mandendu à caternu tuttu ciò ch’è no simu è a nostra memoria. Hè accaduta ancu pocu fà nantu à Canal +… Tandu ci vulerebbe à dumandà ci s’è a libertà di sprime prupositi razzisti è antisemiti fussi veramente una libertà di spressione…
