Sò sei ore è quartu di matina è facciu i centu passi nant'à u Boulevard Paoli, A Traversa cum’elli dicenu i Bastiacci o i paisani di sti cuntorni. Collu da a Piazza San Niculà sin'à u Palazzu di ghjustizia aspettendu chì u Café Riche aprissi e so porte. U tempu hè goffu, ùn ci hè micca un ragiu di sole. A cità di Bastia ghjè viota viota, ùn ci passa mancu un gattu è i magazini sò tutti chjosi. Ùn sò mai stata in villa cusì prestu, trovu ch'ella hè bella sta cità, ancu senza nimu cun solu i so lumi aranci.
S'è sò quì ghjè perchè un mese fà aviu lasciatu un CV ind’è stu baru per pudè travaglià quì è serve i clienti. Illusione, ùn mi ne facciu postu ch'ellu ci era digià dui servori, aviu lasciatu e mo lettere appena da partuttu, ma ùn vi piattu chì u patrone m'avia lasciatu un'impressione cusì bona ch'o speravu di pudè travaglià quì un ghjornu. Ma mi ne sò stata senza risposte da nisunu.
A dumenicata scorsa, mi sò detta ch'o duviu circà in un’antru locu chè Bastia, perchè in sta cità per truvà e piazze, vi spiecu !... Quelli chì travaglianu quì, ci sò dapoi parechji anni.
Ghjeru allungata ind'u mo lettu per fà mi una sunnata quandu u mo telefonu sunò, ghjera u patrone chì mi chjamava per vene à travaglià ind'u Café Riche à parte si di u luni dopu, è, s'è à a fine di a settimana s'era passatu bè, serebbe pigliata per un cuntrattu CDI. Aviu trovu un travagliu è in più di què, per una durata indeterminata. Ghjeru veramente cuntenta d'issa! Forse chì un servore chì travagliava quì avia finitu u so cuntrattu.
Dunque oghje simu u luni è sò in avanzu postu chì u caffè apre versu sette ore.
Vecu da luntanu una faccia ch'o cunnoscu, un omu chjucu è chjattu, vestutu bè, cù un custume elegante, u surrisu in bocca. Ghjè u patrone, Mr Ricoveri.
- Salute Madama Rossi, site digià quì ? Mi face piacè ch’è vo siate in avanzu.
- Iè aghju l'abitudine d'esse in avanzu in generale, è in più serebbe statu male d'esse in ritardu per u mo primu ghjornu, quantunque!
- Iè hè nurmale... avà ch'è no ci simu, entrite puru avemu ancu u tempu di beie ci un caffè.
Stu baru ghjè cunnisciutu bè da i Bastiacci, ci sò l'abituati. Mi tuccava à travaglià bè per ùn fà mi rinturchjà, chì in più aghju una settimana di prova.
Una volta u caffè pigliatu u patrone mi fece visità i lochi. Dunque daretu à u cuntuaru ci sò i placcà per allucà i bichjeri, sopra si mettenu tutte e buttiglie in presentazione. À a manca ci sò i cacatoghji è di l'astru latu ci sò e scale per falà ind'a riserva. Falemu sottu cun Mr Ricoveri per vede appena induve tuttu hè assestatu.
- Guardate ind'u placcà in ferru ci hè l'alcolu, tutte e buttiglie sò quì, dopu ind'u placcà accantu ci sò e bivende di frutti è i sciroppi.
- È ind’è l'armariu in fondu ci hè qualcosa dinù ?
- Nò nò! Quessu ghjè vechju è rottu ; ùn ci mettu più nunda dentru, ghjè chjosu ùn ci hè mancu a chjave, aghju da caccià lu di quì quandu aghju u tempu.
- Và bè, allora pensu qu'aghju da ritene.
Ricullemu sopra è M.Ricoveri mi presenta u mo cullegu Anghjulu, un omu giovanu di vinti cinque anni à pocu pressu, propiu bellucciu è surridente.
- Vi lasciu à tremindui, aghju parechji affari à fà durante a ghjurnata, a sapete ch'ellu ci vole fà i conti per tuttu, è po ci vole ch'o riempiessi i scartafacci di Jenny cum'ella ùn travaglia più quì... À sta sera.
Anghjulu m'hà spiecatu chì Jenny ùn era micca corsa, era d'Ingliterra ma s'era lasciata cù u so maritu chì era un scemu è per fughje lu era venuta sola quì perchè a so caccara da a banda materna hè di Bastia.
U patrone avia accettatu di piglià la per travaglià cun ellu. Hè talmente bravu !... Ùn la pudia lascià cusì senza nunda, li hà ancu trovu una casa in San Ghjisè.
Ma duie settimane fà hà lasciatu una lettera induv'ella dicia ch'ella vulia rientre ind'è ella, perchè chì u so paese nativu li mancava. Anghjulu era appena tristu ch'ella ùn era mancu venuta per dì li in faccia, era partuta cusì cum'è una ladra.
Oghje e ghjente ùn anu più sintimi, si n'enfuttenu di tuttu.
Durante ch'o travagliavu aghju scuntratu parechje persone, longu à a mo ghjurnata… Ghjente più o menu simpatica... Ancu s'ellu hè appena faticosu, simu ind'una bona ambienza è sò cuntenta di u mo primu ghjornu.
Mr Ricoveri era rivenutu, facia digià notte cun l'ora d'invernu.
- Sò sette ore menu un quartu, pudete rientre in casa vostra, sò cuntentu di voi per u vostru primu ghjornu Madama Rossi, bona sera è à dumane.
- Sò dinù cuntenta di travaglià inde stu locu, aghju l'impressione d'avè travagliatu quì dapoi parechji anni, mi sentu bè è ghjè rara per un primu ghjornu. Bona sera anc'à voi.
Ripigliai a mo vittura accansata ghjustu accant'à u baru. A cità, à u cuntrariu di a mane, era piena di ghjente, una coda di vitture stinzata sin'à ind’è mè, in E Ville di Petrabugnu, è po, cuntinuava torna ind'u Capicorsu... Basta ch'ellu falessi sia duie gocce per chì a ghjente ùn sà più cunduce !
Per a prima volta mi sentiu bè : ghjeru cuntenta di rientre ind'è mè dopu à una bella sperienza. À vinti sette anni eru sola, senza figlioli nè maritu, per una volta aviu un scopu ind'a mo vita. Avete da piglià mi per una scema, ma eru cuntenta di mette a mo sveglia à sunà per sei ore di matina è cusì pudè mi ne andà à travaglià u lindumane !
Dopu a settimana compia, ghjera ufficiale, ghjeru a serva di u Café Riche è què per quant’ella mi garberebbe, sin'à qual'hè chì sà quandu !
Cunnisciu quasi tutti i clienti, chì per a più parte eranu l'abituati.
Un ghjornu aviu servitu à tuttu u mondu. Ghjeru à u cuntuaru in traccia d'accuncià a mo robba quandu sentii una cunversazione trà duie donne chì parlavanu di Jenny l'anziana servora. Dicianu chì ghjera stranu ch'ella partissi di quì cusì, senza prevene à nimu, solu una lettera, ancu à a so caccara. Dicianu ch'elle a cunniscianu dipoi cinque anni è chì ùn era micca ind'e so abitudine di fà un cosu simule è soprattuttu ch'ella era partuta perchè u so anzianu maritu a persecutava. Hè vera chì ghjè appena strana, eiu ùn vogliu micca esse gattiva, ma, m'arranghja bè ch'ella sia partuta, cusì aghju pussutu piglià a so piazza è avè stu travagliu.
È sempre à a listessa tavula è à a listessa ora, ci hè stu giovanu sempre solu chì beie a so limunata, ghjè sempre crianzatu, ma pare cusì tristu, u corciu... Tutte e volte ch'o u vecu mi face pena... I so ochji pare ch’elli guardinu sempre altrò è si ne stà cusì solu sin'à ch'è no chjudimu. À sapè ciò ch'ellu averà...
Sò avà sei ore è cum'è sempre u mo patrone ùn ci hè micca, u vecu solu a matina versu sei ore quandu sò in avanzu o a sera tra sei ore menu quartu sin'à a chjusura. Hà parechji affari à fà in più cù issa Jenny chì hè partuta cusì allora ch'ellu li hà datu tuttu.
Ah ghjè ghjuntu ! Ancu più tardi sta sera.
- Mr. Ricoveri aghju finitu di assestà tuttu cù Anghjulu, sò sette ore : avà pudemu andà ?
- Iè iè bella sicura, vi ringraziu ; cun voi tuttu ghjè sempre pullitu, ùn ci hè mai nunda à dì. À dumane passate una bona sera, durante a settimana v'invitu à manghjà un buccone ind'è mè cù Anghjulu, và bè ?
- Iè cù u piacè ! À dumane !
Oghje m'eru accansata ind'u parking sutterraniu di a Piazza San Niculà. U tempu ch'o falessi, vidii l’omu tristu chì marchjava solu nant'à a Traversa. Ghjera u mumentu d'andà à parlà li appena.
- Salute sò a donna chì travaglia in u Café Riche ùn sò micca s'è vo m'avete ricunnisciutu.
- Iè quantunque, v'aghju vistu nanzu.
- Allora site di quì ? Vogliu dì di Bastia ?
- Iè sò sempre statu quì, duviu parte in Ingliterra l'estate scorsu ma finalmente stò quì.
- Ancu voi site di quallà ?
- Nò duviu andà cusì per visità..., ma perchè ancu eiu ? Cunniscite ghjente di quallà ?
- Eiu nò, ma a serva chì travagliava nanzu à mè ghjera di quallà, s'o travagliu quì ghjè perchè hè ripartuta ind'u so paese natale, aghju pigliatu a so piazza cusì.
-Iè, a so ch'ella era d'Ingliterra, ghjè cun ella ch'o duviu parte ma un ghjornu, lascendu ci una letteraccia si ne hè andata. Prima pensavu ch'ellu era una burla o un colpu d’estru ma i ghjorni passonu è ùn aghju mai più avutu una nutizia. Ghjera a mo amica di zitellina a teniu veramente cara issa donna. Era impurtantissima per mè. Dipoi ch'ella hè partuta ùn so mancu più chì fà, giru sempre solu pensendu à ella, à e so manere di guardà mi è di dì mi bonghjornu, à u so surrisu quand'ella mi vidia... Avà, mi sò fattu à l'idea chì tutti issi sintimi eranu solu per mè... chì ossinò ùn serebbe mai smarrita cusì senza dì mi nunda...
- Aghju vistu chì qualcosa ùn andava. Mi parite cusì tristu tuttu e volte ch'o vi vecu. Pò esse ch'ella avia bisognu di ritruvà e so radiche è di fà u puntu, ùn sò micca, a cunniscite megliu chè mè...
- Iè ùn la sò... guardate piantate quì ci hè a vostra vittura.
- Mi hè vera ! Cume a sapete ch'ella hè a meia ?
- V'aghju digià vista sorte, stò in villa, ghjustu u casale in faccia di u Café Riche. È po vitture gialle cum'è a vostra ùn ci ne hè trenta quì !
- Nò hè vera ch'ella ùn piace à tuttu u mondu... Ah iè site bè accantu allora. Ùn hè micca per esse indiscreta, ma s'è vo avete bisognu di parlà v'ascoltu quand'è vo vulete. Vi lasciu, à dumane sè mai. Bona sera.
- Iè ci videremu di tutte e manere, vi ringraziu pè a vostra curtesia è per tante attenzione ! À dumane. Bona sera anc'à voi.
Ghjunta ind’è mè, ùn sò micca perchè, ma isse cunversazione mi stavanu in capu. Issu omu m'avia tuccatu cù e so parolle, è po issa cunversazione ch'aviu intesu di e duie donne ind'u caffè, chì dicianu ch'ellu era stranu chì Jenny partessi cusì senza dì nunda à nimu, m'hà fattu riflette tutta a notte.
U lindumane eru decisa. Issa storia ghjera strana è, per ùn sò chì ragione, mi sentiu implicata. A mi dicenu sempre ch’o sò troppu brava, troppu pronta à andà ver'di l’altri : ùn possu guardà a ghjente soffre senza fà nunda… Li tuccava à avè una risposta à stu poveru omu.
Quandu aghju avutu a mo pausa di duie ore, mi sò infurmata da sapè induv'ella stava a caccara di Jenny. Ancu di grazia aghju buscatu u so indirizzu è sò andata à vede la. Mi sò presentata è li aghju dettu a verità nant'à u fattu ch'o sò quella chì hà rimpiazzatu a so figliulina. A tinta ghjera sola, pusava nant'à u so futtogliu è paria trista, cusì s'hè cunfidata cun mè è m'hà cunfirmatu ch'ellu era stranu ch'ella partissi cusì, ch'ella ùn era micca ind'e so abitudine di reagisce cusì ancu s'ella avia avutu un prublema. Issa donna era cum'è a so seconda mamma è Jenny li dicia tuttu.
- A rivecu sempre cù u so mandile turchese è giallu, dice sempre ch'ellu li porta a furtuna. Mai u si lascia, mai u cappia è l’hà sempre à dossu. Ancu di grazia certe volte ci hè Francescu u s'amicu chì vene à vede mi, ghjè bravissimu, mi face appena di cumpagnia è a tene cara quant'è mè... Pensu ch'ellu hè ancu innamuratu d’ella perchè era sempre quì cun Jenny...
U fattu si stà chì parlendu, una parolla è dopu l’altra… ampargu chì Francescu ghjè issu giovanu di u caffè cun quale aghju parlatu, l'amicu di Jenny.
Eranu quasi duie ore ch'o eru custì ind'è ella, peccatu, ma duviu riparte à travaglià.
Per una volta u mo patrone era quì !
- Salute Madama Rossi, vuliu sapè s'è sta sera vulete vene à manghjà cù Anghjulu in casa meia ?
- Ah iè s'è vo vulete !
- Và bè, Anghjulu sà induve stò, venite subbitu dopu u caffè chjosu. À sta sera allora.
U baru chjosu, ci ne passemu à pedi sin'à u Boulevard Graziani è pichjemu à a porta di Mr Ricoveri.
- Entrite puru ! A mo moglie si scusa d'ùn esse quì ma hè partuta ind'a so mamma cù i zitelli sta mane perchè chì a mo socera hà pigliatu fretu è ci vole ch'ella l'aiuti.
- Ùn v'inchietate ùn face nunda, avete una bella casa !
- Vi ringraziu, u meritu vene tuttu à a mo moglie perchè li piace a decurazione...
Quandu avemu cuminciatu l'apperitivu ne aghju prufittatu per parlà di Jenny. Mi disse ch'ella era una donna brava, sempre quì per aiutà, u surrisu sempre in bocca, ch'ella bastava à guardà la per sente si vene a gioia à dossu... ma chì u so culpacciu di parte senza prevene à nimu li avia ficcatu una curtellata in core cù tuttu ciò ch'ellu avia fattu per ella.
E so parolle eranu cumuvente ma in listessu tempu, mi paria ch'ellu ùn parlava più di Jenny, ma piuttostu di a so moglie certe volte... Infine ùn aghju circatu, ma ùn ci era manera di capì propiu da duv’ella venia issa impressione custì.
- Mr Ricoveri, quandu sò andata ind'a salla di bagnu per lavà mi e mane, aghju vistu u mandile di a vostra moglie, ghjè magnificu ! Ne cercava unu cusì, ma ùn ci hè mai nunda in Bastia !
- Iè li piace à cumprà. Ùn face chè què, tutte e so dumenicate, e passa à fruchignà s’ella trova qualcusella da cumprà ! Li diceraghju è li farà piacè, disse l’omu mezu burlaschendu è mezu intenneritu.
Compiu u ripastu, quandu sò rifalata sola sin'à a mo vittura, aghju scuntratu torna à Francescu.
- O site torna quì voi !
- Iè sò andatu appena à marchjà, mi piace a notte. Ma eiu stò quì, ghjè piuttostu à voi ch'ellu ci vole à dumandà ciò ch'è vo fate à st'ora in villa ? Avete travagliatu sin'à avà ?
- Nò, avemu fattu un ripastu ind'è u mo patrone cù u mo cullegu è avemu compiu avà.
- D'accordu allora bona fine di sera, à dumane. Mi faraghju un’affaccata solu appena per vede vi.
- Per vede mi ? À mè ?
- Iè. Site voi chì mi date u laziu di vene à beie un colpu inde stu caffè perchè avete sempre u vostru bellu surrisu in bocca è ghjè veramente piacevule. È po site sempre arrangiata, avete sempre i vostri capelli bruni lintati… ghjè bellu. Site una bella donna.
- Ùn sò micca cosa dì vi... vi ringraziu mi face piacè ciò ch'è vo mi dite.
- Sò sinceru è a dicu cum’è a pensu. È dite mi di « tù » ùn sò micca un vechju ! È mi chjamu Francescu, avà à sapete.
- Iè ancu voi mi pudete dì di « tù ». Eiu mi chjamu Paola, à dumane allora.
E parolle di Francescu m'avianu fattu qualcosa. L’omu mi piacia. U trovu bellucciu, è po ghjè sentimentale, si vede ch'ellu hè un omu sensibule. Ci hè qualcosa chì risorte in ellu, mi piace ghjè cusì.
U lindumane cuntinuavanu e mo abitudine, serviu a ghjente ma ùn ci era più whisky dunque è durante chì Anghjulu servia, sò falata ind'a reserva per piglià una buttiglia. Tutte e volte ch'o falgu quì, mi face sempre un'impressione, st'armariu chjosu. U patrone m'hà dettu ch'ellu duvia caccià lu perchè ghjera vechju ma ghjè sempre quì. Sott'à u cuntuaru ind'un tirettu aviu trovu una chjave ma ùn sapia micca à cosa ella servia… È po mi sò detta perchè nò, sò ricullata à piglià la è aghju pruvatu d'apre u placcà. Miraculu aviu trovu issa famosa chjave chì u mo patrone cercava ! Ma quandu aghju apertu e porte averebbe preferitu d'ùn fà nunda, una pila sana di fottò di u mo patrone cù una donna! Si basgiavanu ancu ! Ci era ancu una lettera firmata « Jenny ». Ghjeru azzuncata ! U peghju ghjè ch'ella purtava u mandile ch'o aviu vistu in casa ind'è ellu ! Prima, ùn aviu micca fattu a relazione di una cosa cun l’altra, ma avà mi rivenianu e parolle di a caccara quand'ella avia dettu di i culori, à puntu d’issu mandile. Dunque era u soiu, micca quellu di a moglie ! In fatti a burlava cù Jenny, ghjera a s'amica. Mi sò spicciata di rimette tuttu in piazza, cumu s'ellu ùn fussi nunda. Ùn ci vulia chì u mo patrone a sapissi ma, sentiu cresce in mè un sintimu stranu chì da una banda, qualcosa m'insischia, ma da l’altra parte ci era cumu una voce chì dicia di seguità pianu pianu issa pista...
Issa storia averà qualcosa à vede cù u fattu ch'ella era scappata Jenny ? Mi tuccava à sapè la… È po, scappata, quale a pudia sapè...
Quandu sò cullata ci era Francescu, li aghju datu un appuntamentu dopu à u mo travagliu.
À a fine di a ghjurnata, cum'è previstu ci simu visti è li aghju cuntatu a mo piccula scuperta. Era stunatu, ma mi hè parsu ch'ellu ùn era in fatti cusì surpresu è ancu à pena cumu s’ellu ùn scuprissi micca l’affare avà. L’aghju trovu una cria impeseritu è ancu nervosu, appena annerbatu. Mi disse ch'ellu duvia andà perchè aspettava mondu ind'è ellu è ghjè partutu subbitu.
Sicura chì duvia fà li qualcosa postu ch'ellu era innamuratu di Jenny d'apress'à a so caccara.
U lindumane Francescu rivense ind'u caffè è mi disse ch'ellu mi vulia parlà. Durante a mo pausa sò andata cun ellu.
- Ascolta Paola, ti facciu cunfidenza, t'aghju da cuntà ciò ch'o sò. Jenny m'avia dettu chì u patrone li facia avanze è ch'ella era scumudata di pettu à a so moglie, ma cù u tempu avianu avutu una rilazione, ma Mr Ricoveri diventava di più in più presente, è Jenny ne avia una techja, una sera m'hà chjamatu per dì mi ch'ella avia piantatu sta relazione perchè ghjera troppu un pesu per ella, vulia ancu scambià di caffè perchè avia trovu una piazza ind'è u baru l'Albert Premier. È cumè per azardu dui ghjorni dopu ci hè sta letteraccia induv'ella dice ch'ella riparte ind'è ella ? Prevene u patrone ma micca à mè? Ùn vulia più riturnà in Ingleterra : ghjera troppu bè in Bastia mi dicia sempre, allora d'apress'à mè Mr Ricoveri ùn hè micca per nunda inde sta storia. Face un mumentu chì u suspettu, s'ellu hè ellu hà da pacà la cara, credi mi puru.
Ciò chì Francescu m'avia dettu, ancu s'o ùn vuliu micca adimette la, tenia a strada. Tutte e fottò di ellu cù Jenny ch'ellu piattava dentru issu famosu armoriu induv'ellu avia « persu e chjave » ! È po u fattu ch’ellu pruvessi à fà la passà per una conna dicendu ch'ùn si facia micca di parte cusì allora ch'ellu avia fattu assai per ella ! È po u tippu ùn n'hè mai à u travagliu hà sempre « affari impurtanti » à fà. Ma u peghju di tuttu ghjè u mandile di Jenny ch'ellu hà in casa soia! A so caccara m'hà dettu ch'ella ùn si ne separava mai, ùn averebbe micca pussutu parte di quì senza piglià lu quantunque...
Cosa averà fattu à Jenny? Sarà veramente partuta di Corsica? À sò chì ciò ch'o avanzu ghjè grave ma s'ellu s'hè passatu qualcosa ci vole à sapè la.
Oramai, eiu è Francescu aviamu qualchì prova. Ci tuccava ghjustu à riesce a pruvà la à i flicchi perch'elli fessinu un'inchiesta appruffundita. Ma Francescu ùn vulia micca subbitu, vulia aspettà torna appena per vede s'ella rivenia... È po vulia altre prove per esse sicuru. A pudiu capì, ghjera quantunque a s'amica di zitellina è ghjera difficiule ciò ch’è no pensavamu. Ma aghju sempre tenutu e prove per dà le à u cumissariatu quandu u mumentu sarebbe venutu...
Aghju cuntinuatu di travaglià ind'u Caffé Riche per pudè inguccià issu Mr Ricoveri, perchè a sapiu ch'ellu ci era qualcosa cun ellu, ùn sapiu micca perchè ma di più in più aviu un gattivu presentimentu di pettu à sta storia...
È po, mi sò messa cun Francescu, cumminciavu à tene lu caru di più in più, mi currispundia ; ghjera evidente trà noi. A sò ch'ellu hè un affare precipitatu, ma avemu ancu decisu di piglià ci una casa inseme.
Cum’è no simu in a dumenicata, l'aghju passata ind'è ellu… A matina quandu m'aisu Francescu dorme sempre… Ghjè à bon’ora. Decidu di falà à a panatteria Carlotti per piglià li curnetti. Quandu sò ricullata ghjera sempre ind'u lettu stu durmigliò. Ne aghju pruffittatu per circà un piattu è preparà li u rompidighjunu, ma ghjera impussibule di truvà u caffè. Quandu aghju apertu u placcà era viotu viotu, cù una tendina rossa in fondu… Era stranu què... Aghju tiratu a tendina è quandu aghju guardatu daretu aghju vistu cum'è una porta. Mi sò detta ch'ella era una porta cundannata chì duvia ghjunghje à a so camera… Vuliu fà li a paura, allora aghju tiratu l'impugnatura, ma quandu aghju apertu a porta u mo core si ne hè falatu in terra, sò stata bè vinti seconde davanti à ciò ch'o venia di vede :
Una sala intera di fottò di mè, sola, à u travagliu, davanti a mo vittura, nant'à a traversa Paoli, durante ch'o facciu e mo corse è ancu davanti à ind'è mè! Ghjeru spiata dipoi ùn sò quandu! È in terra ci eranu parechje foglie gravigliate firmate « Jenny » induve ci era scrittu di parechje manere ch'ella riturnava in Ingleterra!
Ùn la pudiu crede. In fatti st'omu ch'o cumminciavu à tene caru era un psicopattu! Ghjera ellu chì avia scrittu quella lettera di Jenny è in più vulia fà accusà à Mr Ricoveri. Ghjeru ammazzata sopr'à locu ! Ùn pudia micca esse pussibule, cumu averà fattu tuttu què solu? Induve sarà allora issa povera donna? Cosa li averà pussutu fà? Ci vulia ch'o chjamessi i flicchi subbitu! È soprattuttu ùn ci vulia micca à fà rimore per ùn sveghjà lu...
Ma u peghju vene avà, quandu mi sò girata è ch'aghju vistu st'affare daretu à a porta... ùn pudiu più move, m'hè venutu u vomitu in bocca, mi sò ritenuta! Francescu era avà arrittu davant'à mè.
- Paola, u m’amore, ùn abbia micca a paura di mè infine....
Pigliava una voce dolce cum’è s'ella ùn ci era nunda !
- Induv'ella hè Jenny ?? Hè quì ??
- Ci vole ch'è tù capischi chì Jenny era meia! U so tonu scambiava.
S'ella s'era messa cù mè è micca cù stu connu di Ricoveri mai ùn si serebbe passatu! Issa legera! Eiu a teniu cara! Ghjeru innamuratu dipoi ch'era chjucu! Un capia nunda ella, ciò chì cuntava per ella ghjeranu i soldi! È issu vechjacciu di Ricoveri! A sera induve t'aghju dettu ch'ella l'avia lasciatu ùn era vera, in fatti m'avia dettu ch'ellu avia da lascià a so moglie per ella è ch'elli si vulianu marità inseme! Un pudiu micca lascià l'amore di a mo vita parte cù un antru omu! Duvia esse a mo moglie micca a soia! Ghjera meia è m’appartenia à mè !
- Francescu, sì cumplettamente scemu!
Li tirai u piattu in faccia è scappai sin'à a gendarmeria!
Dece minute dopu, i flicchi eranu inde l'appartamentu di Francescu, daretu à a porta ci era veramente ciò ch'o pensavu inde stu tamantu saccu appiccatu... u corpu d'una donna giovana ingutuppatu, facia un mese ch'ella era dentru, ci vulia à fà una autopsia per sapè di quale era u cadaveru, ma eiu à sapia digià...
I flicchi truvonu ind'u tirettu parechje fottò di donne sfarente chì eranu sparite. In fatti ghjera un assassinu in seria, un Serial killer ! L'aghju veramente scorsa brutta !
Francescu ùn ci era più era partutu di a casa. Aghju fattu a mo depusizione ind'a gendarmeria postu chì avà sapiu tuttu di a storia. Ùn ci era più chè una cosa da fà : truvà lu ! Sculinà u locu duv'ellu si era intanata a bestia !
Un annu dopu, in Bastia a ghjente cumminciava à ripiglià si appena di pettu à tamantu spaventu, ma ùn ci ne scurderemu mai è soprattuttu eiu, chì in più Francescu ùn hè mai statu trovu, ma aviu previstu di parte di sta cità cù u mo nuvellu amicu ch'è vo cunniscite digià, Anghjulu u mo cullegu. Sta storia ci avia avvicinati assai è ci simu innamurati.
Sta sera m'hà invitata per andà à manghjà ind'u risturante Chez Vincent à a citadella. Sò pronta è cuntenta postu chì ghjè u mo priferitu. È po a vista hè magnifica, dà nant'à tutta A Marina è u vechju portu.
Sò ott'ore è sonanu à a porta, què ghjè ellu!
- Salute u mo amore, ti si bè preparata sì veramente bella sta sera.
- Ti ringraziu u mo core.
- Tè trovu chì què anderà propriu bè cù u to vestitu!
- Anghjulu induve ai pigliatu stu mandile turchese è giallu?? Sai à quale era madonna?
- Iè a so, u mo mezu fratellu Francescu mi l'hà datu eri, sai quellu ch'è tù ai vulsutu fà andà in prigiò? Fà puru u to segnu di croce ch'ùn si tuccherà mai à u sangue meiu !
