A ghjurnata urganizata da u Cullettivu Parlemu Corsu in Prumitei hè stata l’occasione di liberà una stonda a lingua da u chjostru di a "cultura" per pone a prublematica di a lingua in u mondu ecunomicu.
U Riacquistu linguisticu passa per l’ecunumia
S’è mi pudia permette di fà un rimproveru à quelli di a leva di u sittanta, dicerebbe ch’ùn anu micca abbastanza intrecciatu u riacquistu cullettivu di a lingua incù u so impegnu prufessiunale o ecunomicu. Malgradu u discorsu ribattutu nant’à "a lingua di u pane" è certe dimarchje di prima trinca cum’è quella di a Corsicada, pianu pianu, a scursufunisazione di a ghjuventù hà cuntribuitu à spiccà l’ecunumia da a rivendicazione linguistica. U penseru maiò era di fà entre u corsu à a scola, tenendu cum’è pustulatu ch’ellu basterebbe l’insignamentu per salvà è dinamizà una lingua in periculu.
Un patrimoniu è una respunsabilità cullettiva
Or chì si passa oghje ? L’insignamentu ùn basta micca ! A scola a si prova d’inghjennà à straziera un plurilinguismu chì integra u corsu ma l’utilitarisimu di e famiglie è u dispusitivu legislativu oghjincu ùn permettenu micca a custruzzione d’un insignamentu di u corsu cuntinuvu è efficace. Perchè ? A lingua abbisogna una visione trasvirsale. Ch’ellu ci fussi un dipartimentu à a CTC o forse dumane un uffiziu di a lingua, hè una bona ma ùn ci vole micca chì l’altri settori è attori, publichi o privati, si franchessinu di e so rispunsabilità di pettu à a lingua. E cuntradizzione sò numerose. L’Università è l’Educazione naziunale creanu un certificatu per valurizà u corsu in l’imprese ma l’ANPE, sottu à u pretestu di « discriminazione », ricusa di publicà un offerta d’impiegu per ricrutà una sicritaria cursofona…
Assucià u sviluppu ecunomicu è u riacquistu di a lingua
Ghjè tandu ch’elli entrenu in ballu u Cullettivu Parlemu corsu è u situ pilotu Prumitei in fatti d’ecunumia identitaria. A vista guidata da Dumè Gallet in lingua
corsa hè stata l’occasione d’illustrà l’intoppi sopratuttu lessicali di a ricunquista di l’aghja ecunumica. L’Università di Corsica è u Cunsigliu di a lingua
averanu di sicuru un rollu à ghjucà da stabilisce certi neulugisimi ghjuvaticci. In quantu à u dibattitu, ci pudemu lagnà di a mancanza d’imprese prisente ma l’idee è a vulintà di fà, ci sò.
Tandu, a rispunsabilità di Prumitei ùn hè chè più maiò. Accantu à l’arte di a terra, di u
vetru è di u bronzu, li tocca à ammaestrà nun solu l’arte di u dì ma dinù quellu di u fà, l’arte di u cambià chì di a tradizione, ne face una mudernità.
State à sente à Micheli Leccia, u purtavoce du u Cullettivu Parlemu corsu interrugatu da Roland Frias per Alta Frequenza.
Profil de Newtizie Di A Nazione | Créez votre badge
langue corse economie michel actualite tourisme developpement durable padduc aghja nova
